Vefur ríkisskattstjóra, besti ríkisvefurinn 2013

29.11.2013

Á ráðstefnu sem haldin var í gær, fimmtudaginn 28. nóvember, á vegum innanríkisráðuneytisins, Sambands íslenskra sveitarfélaga og Skýrslutæknifélags Íslands, var tilkynnt hvaða opinberu vefir stofnana, ráðuneyta og sveitarfélaga þættu bestir í notkun og virkni.  Alls voru kannaðir 265 vefir og mat lagt á þætti er snerta innihald, nytsemi, aðgengi og þjónustu.  Jafnframt valdi sérstök dómnefnd besta vef sveitarfélags og besta ríkisvefinn fyrir árið 2013.

Upplýsingavefur ríkisskattstjóra, rsk.is, fékk hæstu einkunn en vefurinn fékk í heildina 98 stig af 100 mögulegum, þar af fullt hús stiga í þremur af fyrrgreindum fjórum flokkum.

Að auki hlaut vefur RSK viðurkenninguna: „Besti ríkisvefurinn 2013“ að mati dómnefndar, en formaður hennar var Marta Kristín Lárusdóttir lektor við Háskólann í Reykjavík.  Í umsögn dómnefndar um vefinn segir:

„Vefurinn er uppbyggður á skipulegan hátt og tekist hefur að setja fram gríðarlega mikið magn flókinna upplýsinga á skýran og aðgengilegan hátt.  Leitarvélin virkar vel og gerir upplýsingaleit auðvelda.  Útlit vefsins er stílhreint, hann hefur rólegt yfirbragð og þægilegt viðmót“

Nýi vefurinn, sem var tekinn í notkun 2. október 2012 á 50 ára afmæli stofnunarinnar, er verk fjölmargra starfsmanna ríkisskattstjóra sem og starfsmanna Hugsmiðjunnar.

Á myndinni eru þeir starfsmenn ríkisskattstjóra sem báru hitann og þungann af vinnu við nýja vefinn. Frá vinstri: Jóhannes Jónsson, Elín Alma Arthúrsdóttir, Einar Valur Kristinsson, Jarþrúður Hanna Jóhannsdóttir, Haraldur Hansson, Bryndís Gunnlaugsdóttir og Ragnheiður Björnsdóttir.