Fyrirframgreiðsla þinggjalda

Þar til álagning hvers árs liggur fyrir, skal hver lögaðili greiða fyrirfram upp í þau gjöld ársins sem eru fyrirframgreiðsluskyld. Þau eru: Tekjuskattur, jöfnunargjald alþjónustu, sérstakur fjársýsluskattur og sérstakur skattur á fjármálafyrirtæki. 

Fyrirframgreiðsla byggir á síðustu álagningu og reiknast 68% af álagningu sl. árs og dreifist 8 gjalddaga frá og með febrúar (8,5% af álagningu síðasta árs á hverjum gjalddaga). Eindagi er mánuði eftir gjalddaga.

Dráttarvextir eru reiknaðir af því sem gjaldfallið er, ef ekki hefur verið greitt innan mánaðar frá gjalddaga. Ógreiddir dráttarvextir teljast með eftirstöðvum viðkomandi ára. Innborgun til greiðslu gjalda gengur fyrst til lækkunar á elstu skuld.

Sækja um lækkun

Heimilt er að sækja um lækkun á þeirri fjárhæð þinggjalda sem aðila er gert að greiða fram að álagningu. Umsókn um lækkun skal senda á netfangið umsoknir@skatturinn.is. Ríkisskattstjóri úrskurðar um lækkun greiðsluskyldunnar. Umsóknarfrestur er til 31. maí. 

Ef sótt er um lækkun eða niðurfellingu fyrirframgreiðslu þarf að sýna fram á með skýringum og/eða gögnum um verulega lækkun skattstofna verði að ræða á milli síðasta gjaldárs og yfirstandandi gjaldárs, sbr. skilyrði sem fram koma í auglýsingu ríkisskattstjóra. Skilyrðin eru helst eftirfarandi:

• skattstofnar verði 25% lægri en þeir voru á sl. ári
  
• álögð gjöld lækki um a.m.k. kr. 100.000.
  
• sýnt sé fram á lækkun með framlagningu skattframtals ásamt ársreikningi.
  

Skatturinn veitir upplýsingar um greiðsluskyldu fram að álagningu.

Sýslumenn utan höfuðborgarsvæðisins og Skatturinn veita upplýsingar um greiðslustöðu, útborgun inneigna og innheimtu skulda.

Ítarefni

Hvar finn ég reglurnar?

Innheimtuaðilar - 111. gr. laga nr. 90/2003, um tekjuskatt

Gjalddagar - 112. gr. laga nr. 90/2003, um tekjuskatt